Sjukeheimen som friskna til

Vi er i Kolstibotn i Bergen. Fargesprakande tre omkransar Kolstihagen sjukeheim. Her møter Idébanken tre damer som kan bevise at grundig IA-arbeid nyttar.

Nærværsprosjekt blei redninga

Vi får først høyre om den vanskelege situasjonen for to år sidan.

–  Fråværet var høgt, og på ein av avdelingane hadde ein alvorleg konflikt utvikla seg. Vi fekk pålegg frå både Arbeidstilsynet og Helsetilsynet, fortel Anita Wøbbekind Johansen, konstituert styrar ved Kolstihagen.

Det var i denne situasjonen at NAV Arbeidslivssenter Hordaland tok kontakt for å tilby si hjelp. Snart var sjukeheimen i gang med eit nærværsprosjekt i samarbeid med to IA-rådgjevarar. I dag er situasjonen ved sjukeheimen ein heilt annan.

Tilliten er tilbake

Nærværsprosjektet blei styrt av ei gruppe samansett av tillitsvalte, verneombod, styrar, avdelingsleiarar og NAV. Anita Wøbbekind Johansen fortel at dette blei starten på eit mykje betre samarbeid mellom partane på arbeidsplassen.

–  Det var faktisk dei tillitsvalte som styrte heile nærværsprosjektet. Tidlegare var det vanskeleg å få utnemnt tillitsvalte og verneombod. Dei tillitsvalte blei berre kopla inn ved turnusforhandlingar. Verneombodet var inaktivt. No er dei mykje meir aktive, fordi dei er i ein posisjon der dei kan påverke. Vi har no fleire tilsette som stiller til val.

–  Det er mykje meir tillit her no, stadfester verneombod Gisela Egeland.

Dugnad gav ryddigare arbeidsplass

Prosjektgruppa konsentrerte seg om HMS-arbeidet og oppfølging av sjukefråvær. Dei tok seg god tid i starten og la stor vekt på å involvere heile sjukeheimen i arbeidet. Ein prosjektdag for alle tilsette blei ein milepæl i prosessen. Tilbakemeldingane herfrå la grunnlaget for det vidare arbeidet.

Nærværsprosjektet blei ei opprydding i HMS- og IA-arbeidet . Prosjektgruppa laga blant anna ein nærværsperm til kvar avdeling der dei tilsette kan finne handlingsplanar, rettar og plikter, lovar og forskrifter, personal- og arbeidsreglement og info om bedriftshelsetenesta.  Leiarane har blitt trygga på oppfølging av sjukefråvær og sjukeheimen har innført "føre var-samtaler" for tilsette som slit.

–  IA-rådgjevarane frå NAV har vore heilt fantastiske. Dei hjalp oss å få oversikt og sy forskjellige planar saman. Vi fekk også hjelp til å rydde i gamle fråværssaker, seier avdelingssjukepleiar Anne Berit Karlsen.

Friskare sjukeheim

Sjukefråværet ved Kolstihagen er på god veg nedover. Og skal vi dømme ut ifrå humøret til gjengen vi fotograferte, er det ikkje noko i vegen med stemninga ved sjukeheimen.

–  Tilbakemeldinga frå avdelingsleiarane er at sjukeheimen no er prega av ein mykje meir open tone mellom dei tilsette, seier Anita Wøbbekind Johansen.