Triveleg bergverk

Heilt nordaust i landet, innerst i Tanafjorden i Finnmark, ligg Elkem Tana. Bergverket i Austertana har 40 tilsette og er eit dotterselskap av Elkem. Her produserer dei kvarts som ender opp i alle slags produkt over heile verda, alt frå solceller og elektronikk til kosmetikk, bilar og fly.

Idébanken blir tatt imot av den engasjerte HR-ansvarleg Tove Brandtzæg Utsi, som skal forklare kva som har skjedd med fråværet i verksemda.

– Det er berre å ta vare på folk! Det kostar så lite, seier ho.

Følgjer opp og legg til rette

– Vi hadde ikkje fått dei gode resultata utan Tove sin innsats. Ho følgjer opp og bryr seg om dei tilsette, seier dagleg leiar Rune Martinussen.

Samtidig som dei følgjer opp sine tilsette, er Elkem Tana villige til å strekke seg langt for å legge til rette.

– Vi kan legge mykje til rette. Folk må ikkje alltid ha dei tunge oppgåvene. I ein periode kan vi godt omplassere folk, for eksempel til kontrollrommet.

Ansvar og eigarskap

Ansvarskjensle er eit viktig stikkord hos Elkem Tana. Martinussen fortel om brei involvering av dei tilsette. Organisasjonen er flat og teambasert, inspirert av Toyota og Lean. Kvart team har eit område dei har ansvar for.

– Dette er ein del av satsinga vår på kontinuerleg forbetring. Vi kallar det Elkem Business System, seier Martinussen og understrekar at det handlar om å bli stadig betre, ikkje om å kvitte seg med folk.

Hovudverneombod Astrup meiner denne måten å jobbe på gir ansvars- og eigarskapskjensle blant dei tilsette.

– Før hadde vi ein arbeidsformann som gjekk rundt og fordelte oppgåver. No styrer vi mykje av dette sjølv.

Tryggleik gir trivsel

Martinussen og Utsi fortel om eit svært grundig HMS-arbeid ved Elkem Tana (sjå faktaboks til høgre). Dei er begge overtydde om at tryggleik blant dei tilsette er med på å auke trivselen.

– HMS er førsteprioritet. Vi skal være på topp innan HMS og arbeidsmiljø. Elkem Tana skal være ein trygg arbeidsplass der folk trivast, seier Martinussen.

Godt humør

Tilbake i Oslo får Idébanken e-post av HR-ansvarleg Utsi. Det er ein viktig ting vi må få med i artikkelen om Elkem Tana:

– Godt humør er viktig på ein arbeidsplass, og her ved Elkem Tana har vi nokre herlige historieforteljarar. Det er så bra når alt fungerer ved bedrifta og latteren rungar i pausene og elles. Det er utruleg kva vi kan løyse opp med smil og latter.